Ве молиме прочитајте ги сите информации подолу пред да започнете со пополнување на апликацијата.
1. ОСНОВНИ ИНФОРМАЦИИ
Алијансата за родова еднаквост на работното место (GEA), иницијатива на Асоцијацијата за е-трговија на Македонија (АЕТМ), со поддршка од Град Скопје и во партнерство со Халкбанк АД Скопје, објавува јавен повик за учество во програмата „Дигитален раст за жени претприемачи – Women Grow Digital: AI, Growth & Finance Masterclass“.
Програмата е наменета за жени претприемачи, сопственички на микро и мали бизниси и жени кои се во рана фаза на развој на сопствен бизнис на подрачјето на Град Скопје, а кои сакаат да ги унапредат своите знаења и практични вештини во областа на дигиталниот маркетинг, примената на AI алатки во работењето и пристапот до финансии.
Во рамки на програмата ќе бидат избрани 25–30 учеснички, кои ќе добијат можност да учествуваат на еднодневен практичен мастерклас, да разменат искуства и да се поврзат со други жени претприемачи, експерти и претставници на бизнис заедницата.
Дополнително, во рамки на проектот ќе се реализира дигиталната кампања „Жени кои го движат бизнисот“, преку која ќе бидат промовирани дел од учесничките, нивните бизниси и претприемачки приказни.
2. ЦЕЛ НА ПРОГРАМАТА
Целта на програмата е да придонесе кон развојот на женското претприемништво преку унапредување на дигиталните и AI вештини, подобро користење на дигиталните канали за промоција и продажба и зголемување на информираноста за можностите за финансирање и раст на бизнисот.
Преку практична едукација, размена на искуства и промоција на позитивни примери, програмата ќе им помогне на жените претприемачи подобро да ги користат современите дигитални алатки и да идентификуваат нови можности за раст.
Воедно, преку апликацијата ќе се направи кратко мапирање на потребите и предизвиците на жените претприемачи, со цел содржината на програмата да биде приспособена на нивните реални потреби.
3. ОД ШТО СЕ СОСТОИ ПРОГРАМАТА?
3.1. Мапирање на потребите на жените претприемачи
Во рамки на апликацијата, кандидатките ќе одговорат на краток прашалник поврзан со нивното моментално користење на дигитални канали и AI алатки, предизвиците во маркетингот и продажбата, секојдневните бизнис процеси, пристапот до финансии и плановите за раст. Одговорите ќе бидат искористени за подобро разбирање на реалните потреби на жените претприемачи и приспособување на содржините на мастеркласот.
3.2. Еднодневен практичен мастерклас
Избраните 25–30 учеснички ќе присуствуваат на еднодневен практичен мастерклас „Дигитален раст и AI за жени претприемачи“, со физичко присуство во Скопје. Програмата ќе опфати три главни области:
- Growth & Digital Marketing – практични пристапи за зголемување на видливоста, привлекување клиенти и подобрување на резултатите од дигиталниот маркетинг;
- AI for Business – практична примена на AI алатки за маркетинг, истражување на пазар и конкуренција, подготовка на содржини и деловни материјали, продуктивност, комуникација со клиенти и автоматизација на секојдневни задачи;
- Access to Finance – можности за финансирање на жените претприемачи, финансиско планирање и достапни програми, кредитни линии и финансиски производи за развој на бизнисот.
Настанот ќе вклучува и networking сесија за запознавање, размена на искуства и воспоставување нови деловни контакти.
3.3. Дигитална кампања „Жени кои го движат бизнисот“
По реализацијата на мастеркласот ќе следува дигитална промотивна кампања „Жени кои го движат бизнисот“, реализирана во партнерство со Халкбанк АД Скопје. Преку фотографии, кратки интервјуа, видео содржини и други дигитални формати ќе бидат претставени дел од учесничките, нивните бизниси, производи и услуги, претприемачкиот пат и плановите за понатамошен развој. Целта на кампањата е да придонесе кон поголема видливост на бизнисите предводени од жени и промоција на позитивни примери на женско претприемништво.
4. ВРЕМЕТРАЕЊЕ НА ПРОГРАМАТА
Јавниот повик и процесот на селекција ќе се реализираат во текот на октомври 2026 година. Еднодневниот мастерклас ќе се одржи во втората половина на октомври 2026 година во Скопје, а точниот датум и локација дополнително ќе бидат соопштени на избраните учеснички. Дигиталната кампања „Жени кои го движат бизнисот“ ќе се реализира во периодот октомври – ноември 2026 година.
5. КОЈ МОЖЕ ДА УЧЕСТВУВА?
Јавниот повик е наменет за:
- жени претприемачи;
- сопственички на микро и мали претпријатија;
- жени кои се во рана фаза на развој на сопствен бизнис;
кои имаат седиште или ја извршуваат својата деловна активност на подрачјето на Град Скопје. Предност ќе имаат кандидатките кои имаат јасно идентификувана потреба или предизвик поврзан со дигиталниот маркетинг, користењето на AI, растот на бизнисот или пристапот до финансии и кои покажуваат мотивација стекнатите знаења практично да ги применат во своето работење.
6. ШТО ДОБИВААТ УЧЕСНИЧКИТЕ?
Избраните учеснички добиваат:
- бесплатно учество на еднодневниот практичен мастерклас;
- практични знаења од областа на дигиталниот и Growth Marketing;
- практични примери и алатки за примена на AI во секојдневното работење;
- информации за можностите за пристап до финансии и поддршка на женското претприемништво;
- можност за размена на искуства со успешни жени претприемачи;
- вмрежување со други претприемачки, експерти и претставници на бизнис заедницата;
- можност за дополнителна промоција на својот бизнис во рамки на кампањата „Жени кои го движат бизнисот“.
7. ВРЕДНОСТ И УЧЕСТВО ВО ПРОГРАМАТА
Програмата „Дигитален раст за жени претприемачи – Women Grow Digital: AI, Growth & Finance Masterclass“ се реализира од Алијансата за родова еднаквост на работното место (GEA), со финансиска поддршка од Град Скопје и во партнерство со Халкбанк АД Скопје. Учеството во програмата е целосно бесплатно, но поради ограничениот број места, сите пристигнати апликации ќе подлежат на процес на селекција.
8. КАКО ДА СЕ ПРИЈАВИТЕ И РОК ЗА АПЛИЦИРАЊЕ
За да се пријавите, потребно е да ја пополните онлајн апликацијата на следниот линк: https://docs.google.com/forms/d/e/1FAIpQLSest9oNOBIFc8HtAFrwsImHISDFxdXFvic0RBHDNBikOF2taQ/viewform
Рокот за пријавување е 16.10.2026 до 23:59 часот. Пополнувањето на апликацијата трае приближно 10 минути.
9. КРИТЕРИУМИ И НАЧИН НА ИЗБОР НА УЧЕСНИЧКИТЕ
Поради ограничениот број места, од пристигнатите апликации ќе бидат избрани 25–30 учеснички. За да биде земена предвид во процесот на селекција, кандидатката треба:
- да е жена претприемач, сопственичка на микро или мал бизнис или да е во рана фаза на развој на сопствен бизнис;
- бизнисот да има седиште или да ја извршува својата деловна активност на подрачјето на Град Скопје;
- да има целосно и навремено пополнета апликација;
- да има можност да присуствува на целодневниот мастерклас.
Критериуми за евалуација
Апликациите што ги исполнуваат основните услови ќе бидат евалуирани според следните критериуми:
| Критериум | Поени |
| Мотивација за учество во програмата | 0–5 |
| Јасно идентификуван бизнис предизвик или потреба | 0–5 |
| Потенцијал за практична примена на стекнатите знаења и алатки | 0–5 |
| Конкретен план и потенцијал за развој на бизнисот во следните 12 месеци | 0–5 |
| Вкупно | 20 |
Врз основа на вкупниот број освоени поени ќе бидат избрани 25–30 кандидатки со највисоко рангирани апликации.
10. ИЗБОР И ЕВАЛУАЦИЈА
Тимот на GEA ќе ги разгледа сите навремено и целосно доставени апликации и согласно критериумите наведени во јавниот повик ќе направи избор на 25–30 учеснички.
Избраните кандидатки ќе бидат контактирани на e-mail адресата и/или телефонскиот број наведени во апликацијата и ќе добијат дополнителни информации за програмата и организацијата на мастеркласот.
Со потврдување на учеството, избраните кандидатки се обврзуваат да присуствуваат на целодневниот мастерклас.
11. ПРИВАТНОСТ И ОБРАБОТКА НА ЛИЧНИ ПОДАТОЦИ
Со пријавувањето на јавниот повик, апликантките даваат согласност доставените лични податоци да бидат обработувани за потребите на процесот на пријавување, селекција, комуникација и реализација на програмата.
Податоците ги собира Алијансата за родова еднаквост на работното место (GEA), иницијатива на Асоцијацијата за е-трговија на Македонија (АЕТМ), и ќе бидат користени исклучиво за потребите поврзани со реализацијата на проектот, согласно важечките прописи за заштита на личните податоци.
За евентуално фотографирање, снимање и јавно претставување на учесничките и нивните бизниси во рамки на кампањата „Жени кои го движат бизнисот“, ќе биде побарана соодветна согласност од учесничките.
АПЛИЦИРАЈ ОВДЕ: https://forms.gle/gJiaNqvsqyX7jLjw5
